Lawngtlaiah Mock Exercise on Earthquake Disaster buatsaih a ni
Vawiin khan Mizoram district headquarters zawng zawngah lirnghing lo thlen thulha felfai zawka chet lak dan tur enchhinna, “State Level Mock Exercise on Earthquake Disaster” buatsaih niin, Lawngtlaiah chuan hmun 5-ah mock exercise hi kalpui a ni.
Zing dar 10-ah Lawngtlai Bawrhsap pisaah Bawrhsap, District Disaster Management Authority Chairman Pu Amol Srivastava chuan chhiatna thlen hriattirna (disaster siren) tiriin, mock exercise hi tan a ni a. Lirnghingin Lawngtlai khawpuiah chhiatna a thlen anga tih chhin niin, chhiatna tenau hmun hrang hranga thleng karah hmun panga – Government Region Higher Secondary School; Deputy Commissioner Office; SDC Quarters, Electric Veng; Chandmary Bazar leh District Hospital Lawngtlai te chu chhiatna thlenna pui deuh anga lantirin, in chim leh kangmei chhuak kara chhanchhuah hna thawh dan leh thil tih dan tur a taka chan chhin a ni.
Chhiatna thlen veleha mipui insaseng dan tur te, chhiatna thleng chungchang thuneitute hnena hriattir thuai dan tur te, quick response team leh chhiatna thlenna bul hnaia awm khawtlanga tlawmngai pawlte’n chhanchhuah hna an thawh nghal dan tur te, police lamin motor tlan dan an thunun a, chhiatna thlenna hmun an ven dan tur te, kang thelhtute leh line department hrang hrangin an mawhphurhna an hlen dan tur te, hliam tuarte’n damdawia enkawlna an dawn thuai theih nana medical team-in an tih tur leh damlo enkawl hmasak ngai leh na vak lote thliar dan tur te, damdawi ina phurh dan tur leh chhanchhuaktu pawl lian zawk Disaster Response Force te hmanraw chi kim nen an lo thlen huna an chet lak dan tur te he hunah hian tih chhin a ni.
He mock exercise atan hian Incident Commander 5, Site Observer 5 leh Head Observer 1 ruat niin, anni bakah District Administration, Health & Family Welfare Department, Police Department, Fire & Emergency Services leh line department hrang hranga thawktute, DM&R Quick Response Team (QRT), CYLA QRT leh GRHSS NSS te, khawtlang hruaitu leh YLA te’n mawhphurhna hrang hrang lain, mahni mawhphurhna theuhte a tha thei ang bera hlen chhuak turin theih tawp an chhuah hlawm a ni.
Lawngtlaia mock exercise neih zawh a nih hnu hian Lawngtlai DC Conference Hall-ah DDMA Chairman Pu Amol Srivastava hovin debriefing neih chhunzawm nghal a ni a. He hunah hian incident site hrang hranga incident commander leh site observer te hnen atangin report ngaihthlak niin, hmasawnna tura rawtna hrang hrang sawi ho a ni bawk.
Issued by : I&PRO, Lawngtlai