Lawngtlaiah DAY-NULM Festival buatsaih a ni

Lawngtlai City Mission Management Unit, UD&PA Department huaihawta Chandmary Inpui, Lawngtlaia ni thum awh tur DAY-NULM Festival (Exhibition cum Food Fest) buatsaih chu vawiin khan Lawngtlai Additional Deputy Commissioner Pu Abraham Beirazi Khithie chuan a hawng.

Pu Abraham Beirazi Khithie chuan DAY-NULM hnuaia beneficiary leh Self Help Group te’n an thiam thil chi hrang hrang pho chhuah tur an nei chu lawmawm a tih thu leh DAY-NULM hma lakna hlawhtlinna tar langtu nia a hriat thu sawiin, Festival-a inpho zawng zawngte chu an thil siam chhuahah hma sawn zel a, chumi hmanga eizawnna ngelnghet leh hlawkna duhawm zawk chang chho zel turin duhsakna a hlan a ni.

He DAY-NULM Festival-ah hian DAY-NULM hnuaia trade hrang hranga beneficiary-te’n an thiam thil siam chhuahte an pho chhuak a. A zavaiin stall 30 siam niin, March ni 2 thleng Festival hi neih a ni dawn a. Hemi chhung hian mipui tan tlawh theih a nih bakah, an thil pho chhuahte pawh lei theih a ni ang.

Issued by : I&PRO, Lawngtlai