Lawngtlaiah Mizoram Legislative Assembly Deputy Speaker Pu H. Biakzaua’n Teachers’ Inn a hawng

 Lawngtlai Sub-Headquarters MSTA leh Lawngtlai General Headquarters PSTA te ṭang kawp hma laknaa sak, Lawngtlai College Venga zirtirtute khualbuk, Teachers’ Inn chu vawiin khan Mizoram Legislative Assembly Deputy Speaker Pu H. Biakzaua’n a hawng.

Pu H. Biakzaua chuan Teachers’ Inn banga chhinchhiahna lungphek phum zar hliahna puanzar pawt hawngin, kawngkharpuia ribbon zam a cheh chah hnuah kawngkapui a hawng a. Teachers’ Inn chhung lam chu fang kual nghalin, hemi hnu hian Teachers’ Inn Conference Hall-ah building thar lawmna inkhawm buatsaih zui a ni.

He hunah hian Pu H. Biakzaua chuan Teachers’ Inn lungphum chu amah ngeiin a phum thu leh hun rei lo te hnua hawn theiha peih a ni ta leh amah ngeiin a hawng leh thei chu lawmawm a tih thu a sawi a. Mizorama Teachers’ Inn nei thei khawpui an la tam loh laia Lawngtlaiin a nei thei chu District tan mellung pawimawh tak leh hmasawnna chhuanawm tak nia a hriat thu sawiin, mahni insengsova hma latu Middle School Teachers’ Association (MSTA) leh Primary School Teachers’ Association (PSTA) te chu fakawm a tih thu a sawi a. Teachers’ Inn chu a mamawhtute tan thlamuang taka innghahna tur hmun ṭha tak niin, a bik takin thingtlang lam aṭanga hmunpuia ṭul leh pawimawh tia lo kal zirtirtute tan a ṭangkai lehzual hle dawn a ni, a ti.

Pu H. Biakzaua chuan zirtirtute chu mi dangte thiamna pe chhuaktu leh mihring chhertu an nih avangin an hna pawh hna zahawm leh hna pawimawh tak a ni, a ti a. Sawrkar pawhin zirtirtute leh zirna ngai pawimawhin zirna kawnga hmasawnna tur te, zirtirtu indaih lohna phuhru tur leh infrastructure tihchangtlun nan te nasa takin hma a la reng tih a sawi a. Zirtirtute chu an hna thawh hmanga ram leh hnam siamtu an nihna inhre renga rinawm taka an hna thawk tura chahin, ṭha taka sawrkar thawhpui zel turin a sawm a ni.

He huna Khual zahawm, Lai Autonomous District Council (LADC)-a Rural Development changtu Executive Member Pu Lallawmsanga Apetow chuan khualbuk ṭha tak din a nih rualin thianghlim leh zahawm taka enkawl a pawimawh thu sawiin, a awmna khawtlang tiṭawptu leh ṭhenawm khawvengte tana hnawksak a nih loh nan mikhual thlen chungchangah inkaihhruaina dan ṭha tak siam turin MSTA leh PSTA hruaitute chu a chah a. Zirtirtu kal khawmte chu Lawngtlai District chhunga zirna tihhmasawn nan theih tawp chhuah zel turin a chah bawk.

Teachers’ Inn hawnna hun hi Teachers’ Inn Committee (TIC) Chairman Pu B. Lalchungnunga’n kaihruaiin, MSTA Sub-Headquarters Lawngtlai President Pu S. Vanlalkulha’n kal khawmte lawmna thu a sawi a. LIKBK General Secretary Rev. B. Zazawna Lai chuan hunserh hmangin, Teachers’ Inn chu Pathian hnenah a hlan a. TIC Secretary Pu C. Rohmingliana hnen aṭangin Teachers’ Inn sa tura hma lak chhoh dan report ngaihthlak niin, a satu engineer, Pu Robin Vanlalhrina hnen aṭangin technical report ngaihthlak a ni a. PSTA General Headquarters Lawngtlai President Pu H. Lalrinliana’n thu sawi bawkin, TIC Assistant Secretary Pu B. Lalmuana’n lawm thu a sawi a. LADC-a MDC Pu T. Lalengmuana’n ṭawngṭaina hun hmangin hun a khar a. Teachers’ Inn thar lawmna ruai kil ho zui a ni.

Vawiina Lawngtlaia Teachers’ Inn hawnnaah hian LADC-a member-te, sawrkar official-te, zirtirtu thawk lai leh pensioner-te, khawtlang hruaitute, political party hruaitute, tlawmngai pawl ai awhte leh chanchinbu mite an tel a ni.

Vawiina Teachers’ Inn hawn tak hi ₹ nuai 150 senga sak niin, chhawng li a ni a. A zau zawng hi a dung lam fit 43 leh a vang lam fit 30 niin, ground floor-ah tanky, 1st floor-ah chowkidar quarters leh dining hall, 2nd floor-ah conference hall leh office, 3rd floor-ah dormitory, lobby leh room 5 dah a ni a. Room tinah hian bathroom dah tel vek a ni bawk a. February 2021 aṭanga hna ṭanin, March 2023-ah sak zawh a ni.

Lawngtlaia Teachers’ Inn sa tur hian MSTA leh PSTA chuan a hrang ve vea hma lain, PSTA te hma lakna bul ṭanpui nan hian a hun laia Lawngtlai East Bialtu MLA Pu H. Zothangliana chuan ₹ nuai 2 a pe a. A hnuah MSTA leh PSTA chuan Joint Action Committee dina hma lak dun relin, ₹ nuai 15 ve ve an thawh a. Hma lak dun a nih hnu hian Lawngtlai College Vengah a hmun tur ₹ nuai 30-a lei a ni a. Ni 20.01.2021 khan Lawngtlai East Bialtu MLA Pu H. Biakzaua chuan a lungphum phumin, bul ṭan nan ₹ nuai 5 a pe a. Teachers’ Inn sak nan hian MSTA leh PSTA member tinin thla tin ₹ 400/- ṭheuh thawh bawkin hma lak chhunzawm a ni a. A satu engineer-te nena inremna angin, a satute’n anmahni sum senga sain, MSTA-PSTA hian thla tin ₹ nuai 4-in an rul zel a ni.

Issued by : I&PRO, Lawngtlai