CADC MDC Inthlanpui 2023-ah tluang takin vote thlak zawh fel a ni

Chakma Autonomous District Council (CADC) hnuaia Member of District Council (MDC) Inthlanpui, 2023 buatsaihah bial (constituency) 19-a polling station 67-ah te nimin khan tluang takin vote thlak zawh fel a ni.

Vote thlak hi zing dar 7-ah ṭan a ni a. Tlai dar 5 thleng vote thlak hun hawn niin, hemi hun chhunga vote thlak zawh hman lohna polling station ṭhenkhatah chuan polling area-a lut hman chin tan hun hi pawh sei a ni a. Polling station zawng zawngah hian tluang takin vote thlak zawh fel a ni.

CADC-ah hian MDC constituency 20 a awm a. State Election Commission (SEC) chuan 15-Rengkashya MDC Constituency bik tan inthlan hi May ni 17-a neih tura a sawn hlat avangin nimin May ni 9 khan Constituency 19-a polling station 67-ah chauh vote thlak a ni a. 15-Rengkashya MDC Constituency huam chhunga polling station 3-ah chuan May ni 17 khian vote thlak a ni ang.

Constituency 19-a polling station 67-ah vote thlak nana hman Electoral Voting Machine (EVM)-ah vote awm thei zawng zawng 34,474 (mipa 17,455 leh hmeichhia 17,019) aṭangin vote 32,321 (mipa 16,462 leh hmeichhia 15,859) a tla a, chu chu 93.75% a ni.

Inthlan nia election duty avanga mahni vote neihna hmuna vote thlak thei lo turte hnen aṭangin postal ballot hmanga vote thlak dilna 108 dawn niin, postal ballot vote tla 103 a awm a. EVM vote tla leh postal ballot vote tla zat belh khawm chu 32,424 a ni a, chu chu vote awm thei zat (34,474) aṭangin 94.05% a ni.

Constituency 19 zingah vote 1,526 (mipa – 780; hmeichhia – 746) awmna 10-Mondirasora MDC Constituency-ah vote 1,488 (mipa – 761; hmeichhia – 727) tlain, chu chu 97.51% a ni a, vote tlak ṭhatna ber constituency a ni. Vote 3,531 (mipa – 1,749; hmeichhia – 1,782) awmna 5-Kamalanagar ‘N’ MDC Constituency-ah vote 3,096 (mipa – 1,532; hmeichhia – 1,564) tlain, chu chu 87.68% a ni a, vote tlak chhiatna ber constituency a ni thung.

Polling Station 67 awm zingah, 3/4-Nakdarasora Polling Station-a vote awm zawng zawng 261 (mipa – 138; hmeichhia – 123) aṭangin vote 260 (mipa – 138; hmeichhia – 122) a tla a, chu chu 99.62% niin, vote tlak ṭhatna ber polling station a ni a. 7/2-Saizawh West Polling Station-a vote awm zawng zawng 343 (mipa – 161; hmeichhia – 182) aṭangin vote 289 (mipa – 137; hmeichhia – 152) a tla a, chu chu 84.26% niin, vote tlak chhiatna ber polling station a ni thung.

Nimina EVM vote thlak hun khar a nih hnuah polling station tina polling party-te chuan Chawngte an pan khawm nghal a. Strong room awmna Chawngte SDO (Civil) office complex-ah lo dawnsawn zel niin, vote thlakna EVM leh polling material dangte chu felfai taka chhinchhiahin strong room-ah dah luh nghal zel a ni a. Polling party-te hian harsatna awm lovin tukin zingkar khan Chawngte an thleng kim thei vek a ni.

Ruahman lawk dan chuan, CADC MDC Inthlanpui 2023-a vote tlate hi May ni 11, 2023 (Ningani) khian Chawngte SDO (Civil) Office Complex-a Counting Hall pahnihah zing dar 8:00 aṭangin chhiar a ni ang.

Issued By : I&PRO, Lawngtlai