Agriculture Development Board Vice Chairman Pu H. Biakzaua’n Lawngtlaia Residential Sports School sak mek a enfiah

Pradhan Mantri Jan Vikas Karyakram (PMJVK) aṭanga State Sawrkar hmalaknaa Lawngtlai College Venga Residential Sports School sak mek chu tukin khan Lawngtlai East Bialtu MLA, Agriculture Development Board Vice Chairman Pu H. Biakzaua chuan tlawhin, hna kal mek a enfiah.

Pu H. Biakzaua hi Lai Autonomous District Council-a Executive Member ṭhenkhat bakah, District Sports & Youth Officer leh MNF District Hqtrs Lawngtlai hruaitute’n an ṭawiawm a. Hna thawktu contractor-te’n lo dawngsawngin, an hna thawh tawh chin leh hna kal mek te an lo  enpui a ni.

Pu H. Biakzaua chuan hna thawktute chu theih tawp chhuah chhunzawm zel tura chahin, harsatna an neihte a hnena thlen hreh lo turin a chah a. An hna thawh chu ṭhalaite hmakhua thui tak hriltu, ram ro tling a nih avangin a ṭha thei ang bera thawk turin a chah a; an hna thawh chu hun tiam chhunga zo ngei turin contractor-te chu a hrilh a ni.

MLA chuan State Sawrkarin Lawngtlai District chu a ngaihsak hle tih sawiin, District chhunga sports project lian tak tak kalpui a ni chu Chief Minister leh Sports Minister te’n chhim lam an hmangaih vang a ni, a ti.

Lawngtlai Residential Sports School hi ₹ nuai 3,461.70 senna tur niin, DJ Consultancy, Aizawl te’n an thawk mek a. He sikulah hian Astroturf Football Field, Multipurpose Hall, Academic Building, Hostel Building 2, Teachers Quarters leh Principal Quarters te a awm dawn a. Mipa leh hmeichhe hostel, school building leh staff quarters hi sak zawh ṭep niin, 80% zawh tawh a ni a. Nikum (2021) September thla khan sak ṭan niin, kum 2023-ah chuan hawn theiha zawh hman tum a ni.

He Residential Sports School atana phullem phah tur pawh hna thawh ṭan ni tawhin, phullem phah hna hi Decor India te’n an thawk thung a ni.

 

Issued by : I&PRO, Lawngtlai