Bangladesh aṭanga Lawngtlai District-a raltlan lo lut kaihhnawihah venhimna chungchang sawi ho a ni

Kuki-Chin National Army leh Bangladesh Army te inkah avanga Bangladesh aṭanga Lawngtlai District chhunga sahimna zawnga lo tlan lutte dinhmun leh hemi kaihhnawiha ramri chhehvel leh District chhunga venhimna leh mipui himna chungchang sawi hovin vawiin khan Lawngtlai Bawrhsap Pu David Lalthantluanga hovin NIC Conference Room, Lawngtlaiah hybrid mode (offline leh online)-a ṭhut khawm buatsaih a ni.

 

He hunah hian District Administration, District Police, Border Security Force (BSF) leh Assam Rifles official-te telin, Bangladesh aṭanga raltlante sahimna leh District mipuite himna leh ralmuanna kawnga harsatna awm theite sawi ho a ni a. Mipui himna leh District chhung ralmuanna vawn him zel a nih theih nana hma lakna tur hrang hrang ruahman a ni.

 

Lawngtlai Bawrhsap Pu David Lalthantluanga chuan ramri kana chet velna leh khawsakna chungchangah sahimna zawnga lo tlan lutte’n harsatna an tawh lohna tur leh hemi phena dan bawhchhiatna leh ram chhung himna tichhe thei thil thleng a awm loh nan District Administration, Police leh ramri vengtu sipaite inkarah inbiak pawhna leh thawh hona ṭha a awm a pawimawh thu a sawi a. Raltlan chungchangah thu thang dik tawk lo tam tak social media-a theh darh a ni ṭhin chu pawi a tih thu leh chu chuan official-te tan harsatna tam tak a siam ṭhin thu sawiin, raltlan chungchanga thu dik tawk lo theh darh lo tur leh social media kal tlanga an thu hriat apiang awih mai lo turin mipuite a chah a ni.

 

Bangladesh aṭanga raltlante chungchanga Nodal Officer, DRDO Project Director Pi Marilyn Rualzakhumthangi chuan Lawngtlai District chhunga Bangladesh aṭanga raltlan lo lutte dinhmun tlangpui leh District Administration aṭanga chhawmdawl leh enkawl zui kawnga hma lak dan te a tar lang a. District Police, BSF leh Assam Rifles te’n an hma lakna hrang hrang report an pe bawk.

 

He hunah hian Parva-III mipuite rikrap zawnga BSF te chetna a awm nia puhna chu BSF hotute chuan phain, ramri venhimna leh ram chhung himna atana an tih tur chin chauh an tih thu leh raltlante dinhmun hre thiam tak chunga mipui harsatna siam lo thei ang bera hma an lak ṭhin thu an sawi a. Hemi chungchangah hian thil hriat sual a awm zel loh nan ramri vengtute leh mipui inkara inhriat pawh tawnna ṭha a awm theih nan hma lak ni se, tih a ni a. Ramri vengtu sipaite chuan raltlante inphen nana hmang a, ramri kana dan lova chetna – ruihhlo leh ralthuam tawlh ruk leh dan bawhchhiatna dang te, ram chhung himna leh ralmuanna tichhe thei zawnga chetna te a thlen loh nan fimkhur taka hma lak reng a ṭul thu sawiin, hemi kawnga hma lak zui zel dan tur te sawi ho a ni bawk.

 

District thuneitute’n an chhinchhiah danin, Bangladesh aṭanga lo tlan lut hnuhnung berte hi mi 53 niin, February ni 17, 2023 khan an lo lut a. Tun dinhmunah Lawngtlai District chhungah November 2022 leh a hnu lama Bangladesh aṭanga raltlan lo lut mi 541 (mipa 291 leh hmeichhia 250) an awm mek a. An zinga mi 337 chu kum 18 chung lam niin, kum 18 hnuai lam mi 204 an awm bawk a. He’ngte hi Lawngtlai District chhung khaw pariat (8)-a relief camp-ahte an awm hlawm a ni.

 

Bangladesh aṭanga raltlante hi District Administration aṭangin ngun taka vil reng niin, ei leh in, mutbu leh ni tin mamawh zualpui eng emaw zat pek an ni a. Police lamin security thilah vil reng bawkin, Health department aṭangin damdawi mamawh pek an nih bakah health clinic te buatsaihsak an ni a. CYLA leh tlawmngai pawl dang aṭangin a hmuna kal chilha chhawmdawlna pek niin, kohhran leh mimal aṭang pawhin chhawmdawlna eng emaw zat a lut bawk a. District thuneitute chuan raltlante hi khai rual zawka chhawmdawl leh enkawl an nih theih nan ṭanpuina pe turte’n District Administration kal tlang emaw, an hriatpui emawa pek zel ni se ṭha an tih thu an sawi.

 

Issued by : I&PRO, Lawngtlai