CADC hnuaia 15-Rengkashya MDC Constituency inthlannaa polling station pathuma duty turte tirh chhuah an ni

Chakma Autonomous District Council (CADC) Inthlanpui, 2023 buatsaiha constituency dang ruala inthlan buatsaih theih lohna, 15-Rengkashya MDC Constituency-ah chuan vawiin, May ni 17, 2023 (Nilaini) hian vote thlak a ni. He Constituency hnuaia polling station pathuma duty tur polling official-te chu nimin zing khan Chawngte SDO (Civil) pisa atangin Returning Officer, Lawngtlai Bawrhsap Pu David Lalthantluanga chuan a vai liam a, polling official-te hian an duty-na tur hmun theuh an pan nghal a ni.

CADC hnuaia MDC constituency 20-ah May ni 9-a Inthlanpui vote thlak tura ruahman a nih laiin, 15-Rengkhasya bialah hian Bharatiya Janata Party (BJP) official candidate Pu Amit Kumar Chakma chu May ni 4 zan khan mi kut tuarin a boral a. Hei vang hian State Election Commission chuan 15-Rengkashya bialah inthlan hun hi sawn hlain, May ni 12 tlai dar 3:00 thlengin BJP tan candidate thar rawt (nominate)-na hun a hawng a. Hun tiam chhung hian Pu Sukrity Chakma chu BJP official candidate atan nominate niin, May ni 15 chhunlai thlenga chuh tumte inhnuh dawh theihna hun hawnah inhnuk dawk an awm lo va. Heti hian 15-Rengkhasya MDC Constituency-ah hian candidate pathum – Pu Doymoy Daveng Chakma (INC), Pu Prema Ranjan Chakma (MNF) leh Pu Sukrity Chakma (BJP) te an awm ta a ni.

15-Rengkhasya MDC Constituency-ah hian polling station pathum awmin, 15/1-Rengkashya Polling Station-ah voter 618 (mipa 322 leh hmeichhia 296) an awm a; 15/2-Futsury Polling Station-ah voter 478 (mipa 256 leh hmeichhia 222) awmin, 15/3-Lukkisury Polling Station-ah voter 315 (mipa 174 leh hmeichhia 141) an awm bawk a. Bial pum puiah voter mipa 752 leh hmeichhia 659, an zavaiin voter 1,411 an awm a ni.

15-Rengkashya bialah hian vawiin, May ni 17 zing dar 7:00 atang khan vote thlak a ni a. May ni 19 zing dar 8:00 atangin vote chhiar a ni ang.

Issued By : I&PRO, Lawngtlai