Lawngtlai Bawrhsapin Lawngtlai District atanga MCS (Combined Competitive) Prelims, 2021 pal tlangte lawmpuina a hlan

Mizoram Public Service Commission (MPSC)-in November ni 24, 2021-a Mizoram Civil Services (Combined Competitive) Preliminary Examination a buatsaiha Lawngtlai District atanga hlawhtlinna chang a, Mains Exam thei tura tling, mi 18 chu vawiin khan Lawngtlai Bawrhsap Dr Andrew H. Vanlaldika chuan DC Conference Hall, Lawngtlaiah an puala hun buatsaihsakin, lawmpuina a hlan.

 

Dr Andrew H. Vanlaldika chuan Lawngtlai atanga MCS Prelims 2021 pal tlang mi 18 lai an awm chu lawmawm a tih thu sawiin, tawngkaa lawmpuina a hlan bakah, ama mimal sum bawm atangin lawmpuina pawisa fai a hlan theuh va. Pawisa fai a hlan chu tam tham lo te, a hming chauh tak tak a nih thu a sawi rualin, Prelims pal tlangte’n exam hautak zawk hmachhawn chho tura an inbuatsaihnaah a tulna apianga puih a inhuam thu hrilhin, anmahni tan mai ni lo, Lawngtlai District tan a ni tel tih hria a, hlawhtlin tuma ngawrh taka bei turin a fuih a ni.

 

Lairam Isua Krista Baptist Kohhran (LIKBK) General Secretary Rev. B. Zazawna Lai chuan hunserh hmangin, Lawngtlai District atanga Prelims pal tlangte chu Pathian hnaih tlat turin a fuih a. He hun hi Prelims pal tlangte chawh phur nan leh chona petu atana ruahman a nih angin, officer leh zirna kawnga inhmang khawtlang mi challang sawm bikte’n fuihna thu tha tak tak an sawi a. Prelims pal tlangte atangin thu sawi ngaihthlak a ni bawk a. Pu Matthews R. Laldinpuia’n lawm thu sawiin, hun khar a ni.

 

MCS (CC) Examination, 2021 kal tlang hian Mizoram Civil Service post ruak 15 (PwBD tana hauh post 1 telin), Mizoram Police Service post ruak 8, Mizoram Finance & Accounts Service post ruak 8 leh Mizoram Information Service post ruak 4, a zavaiin post 35 hnawh khah tur a ni dawn a. A tawp thlenga exam beitu mi 3,581 atangin mi 424-in Prelims hi pal tlangin, Main Examination leh interview te an la hmachhawn leh dawn a ni.

 

Issued by: I&PRO, Lawngtlai