Lawngtlai District-a Lawngtlai RD Block-ah Gurushala zirtirtu training kalpui ṭan a ni

Lawngtlai District Administration hma laknaa Lawngtlai District chhunga zirna tihhmasawn nana Pratham Foundation nen ṭang duna pawl nga aṭanga pawl sawmpahnih inkar zirtirtute tana capacity development training ruahman chu a thawh khat nan Lawngtlai RD Block huam chhungah kalpui ṭan a ni. 

 

Vawiin khan Lawngtlai RD Block huam chhunga Gurushala Teachers’ Training kalpui tur hi Samagra Shiksha, Lawngtlai District huaihawtin Lawngtlaia Govt Model English School-ah a hawnna inkhawm buatsaih a ni a. He huna Khuallian, Lai Autonomous District Council (LADC)-a Local Administration Department changtu Executive Member Pu C. Rongura chuan zirtirtute zirtirna chu ram leh hnam hma hun hriltu tak tak a nih avangin ram kalsiam atan zirtirtute chu an pawimawh hle a ni, a ti a. Zirtirtute chu hnama chiang, a taka ram hmangaihtu an nih a pawimawh thu sawiin, ṭhahnem ngai taka zirtir hna thawk tur leh kawng eng kimah zirlaite entawn tlaka nun tum turin zirtirtu kal khawmte chu a chah a ni.

 

He hun hi Lawngtlai Block tana Nodal Officer, Samagra Shiksha-a Deputy DPC Pu S. Lalrinsiama chuan a kaihruai a. Pi R. Lalnunthari, District Project Coordinator, Samagra Shiksha, Lawngtlai District chuan lawm thu sawina hun a hmang a. Pu B. Lalchungnunga, Headmaster, Govt Model English School chuan ṭawngṭainain hun a khar a ni.

 

Khuallian Pu C. Rongura hi Pu H. Lalhmingmawia, Member, Planning & Development Board, LADC chuan a ṭawiawm a. He hunah hian LADC-a Education Officer (Middle School) Pu F. Lalhmachhuana leh Master Trainer (Gurushala) Pu Jonathan Kingbawl te pawh an tel.

 

Lawngtlai RD Block chhunga Gurushala Teachers’ Training kalpui nan hian a thawh khat nan sikul pali – Govt Middle School, Thingkah; Govt Model English School; Govt Southern Standard Middle School leh Govt Bethel Middle School te thlan phawt niin, he’ng sikula zirtirtu 65 te chu Master Trainer 6-in an sikula kal chilhin an zirtir dawn a. Training thawh khatna hi naktuk, June ni 23 aṭang khian ṭanin, ni thum chhung kalpui a ni ang.

 

Issued by : I&PRO, Lawngtlai