Close

Lawngtlaia Independence Day 2022 hman tur chungchangah Technical Committee an ṭhu khawm

Publish Date : 02/08/2022
Vawiin khan Lawngtlaia Independence Day 2022 lawmna atana thil pawimawh hrang hrang bawhzuia hma la tura din, Technical Committee chu an Chairman Pu James Miahlung, Additional Deputy Commissioner hovin a office chamber-ah an ṭhu khawm.
 
He hunah hian July ni 22, 2022-a District Level Independence Day Celebration Committee-in Lawngtlaia Independence Day lawm tur chungchanga thu a dah sa leh Technical Committee kuta mawhphurhna a dahte bawhzui dan tur sawi ho a ni a. Mawhphurtu hrang hrangte hma lak tawh chin report ngaihthlak niin, hma lak zel dan tur ruahman a ni.
 
Kumin Independence Day lawmna puala tournament buatsaih diltu sports association pali – Lawngtlai District Football Association, District Volleyball Association Lawngtlai, Lawngtlai District Badminton Association leh Lawngtlai District Table Tennis Association te dilna chu Committee puiin Technical Committee kuta a dah angin, Technical Committee Chairman leh association hruaitute nen inrawn tlan a nih hnuah kumin Independence Day atan chuan football, badminton leh table tennis tournament te chauh buatsaih ni rih mai se tia thu dah awm chu Committee-ah hian pharh leh pawmpui a ni.
 
Committee puiin sikul naupang aṭanga parade contingent awm leh awm loh tur a rel hman loh avangin Technical Committee hian relin, COVID-19 hri leng vanga hun eng emaw chen ceremonial parade neih theih loh hnuah tun Independence Day lawmnaah hi chuan ceremonial parade neih theih ngei tum ni se, tih a ni a. Hemi chungchang a ṭul anga bawhzui a, hma la turin Parade Committee din nghal a ni.
 
Committee puia rel tawh angin, kumin Independence Day lawmna hi Central YLA Playground-ah August ni 15, 2022 (Thawhṭanni) zing dar 8:30-ah hman tum a ni.
 
Issued by : I&PRO, Lawngtlai