Lawngtlaiah Bawrhsap hovin HIV/AIDS chungchang sawi ho a ni

Vawiin khan Lawngtlai District AIDS Prevention and Control Committee (DAPCC) chu an Chairman, Lawngtlai Bawrhsap Pu Amol Srivastava hovin a office chamber-ah an ṭhu khawm.

 

He hunah hian Lawngtlai District AIDS Control Officer (DACO) Dr S. Thaizi chuan kumin January aṭanga August thla thlengin general client mi 456 test aṭangin HIV positive 44 hmuh chhuah nih thu leh nu nau pai (ANC) test 464 aṭangin HIV positive 5 hmuh chhuah a nih tawh thu a sawi a. Medical Officer i/c OST Centre hnen aṭangin oral substitution therapy (OST) la lai mi 170 an awm mek thu leh Buprenorphine supply tam zawk an mamawh belh thu ngaihthlak a ni a. Medical Officer i/c ART Centre hnen aṭangin ART damdawi la mek mi 258 an awm thu te, hri vei ṭhenkhat chhungkaw harsatna avanga veivahna chungchanga harsatna nei an awm thu te ngaihthlak a ni bawk.

 

OST damdawi supply chungchang hi DC aṭangin thuneitute hnenah lehkhaa thlen ni se tih niin, veivahna harsat avanga ART damdawi la mumal thei lote harsatna sut kian dan tur ngaihtuah ni se tih a ni a. ICTC leh ART centre building chungchanga ruahmanna siam ngai chungchangah DC-in damdawi in a tlawh hunah a hmunah sawi ho ni se, tih a ni bawk a. HIV/AIDS hluar zel tur venna atana hma lak dan tur te sawi ho niin, positive hmuh chhuah tharte hnenah vawi khat mai ni lo, a khat tawka counselling pek a ṭulzia te sawi chhuah a ni bawk.

 

Issued by : I&PRO, Lawngtlai