Lawngtlaiah Bawrhsap kal chhuak tur, Dr Andrew H. Vanlaldika thlahna hun hman a ni

Lawngtlai Bawrhsap kal chhuak tur Dr Andrew H. Vanlaldika, MCS pualin vawiin khan Lawngtlai DC Conference Hall-ah tlawmngai pawl leh pawl hrang hrang hminga a huhova amah thlahna hun buatsaih a ni.

 

He hun hi Lawngtlai Additional Deputy Commissioner Pu James Miahlung chuan kaihruaiin, hun buatsaih chhan a sawi fiah a. Lawngtlai Bawrhsap Dr Andrew H. Vanlaldika chuan mimal leh pawl anga uitu a ngah hle a, thlahna chibai buk leh thilpek hlan duh tam tak an awm laiin hun a chep si a, pawl hminga thlah duhte tan a huhova thlahna hun remchang buatsaih a nih thu a sawi.

 

LIKBK Assembly-a General Secretary, Lawngtlai Kohhran Hruaitu Committee Chairman ni bawk Rev. B. Zazawna Lai chuan hunserh hmangin, thlahna thu a sawi nghal a. Lawngtlai District Village Council Association (LDVCA), Central Young Lai Association (CYLA), Mizoram Upa Pawl (MUP) Lawngtlai District Headquarters, Lai Autonomous District Council Officers’ Association (LADCOA), Officers’ Club Lawngtlai (OCL), Lai Women’s Association (LWA) General Headquarters, Mizo Hmeichhe Insuihkhawm Pawl (MHIP) Lawngtlai Sub-Headquarters, Lai Students’ Association (LSA), Lawngtlai District Sports Committee (LDSC) leh Lawngtlai District Badminton Association (LDBA) hruaitu ṭheuhte’n Bawrhsap thlahna thu sawiin, ngaihhruina thilpek an hlan hlawm a. Lawngtlai DIPRO Pu C. Lalhruaitluanga buatsaih, “Dr Andrew H. Vanlaldika’n Lawngtlai Bawrhsap a nih chhunga a hna thawh hrang hrang hlimthlate” (video) thlir ho a ni bawk.

 

He hunah hian Lawngtlai Bawrhsap kal chhuak tur Dr Andrew H. Vanlaldika chuan Bawrhsap hna a thawh chhunga Lawngtlai District mipui, pawl hrang hrang, kohhran, District Council leh sawrkar department hrang hrangte thawhpuina leh ṭawiawmnaah lawm thu a sawi a. Lawngtlai District-in kawng tinrengah hma a sawn zel theih nan kal khawmte chu mahni hma zawn ṭheuhvah ṭhahnem ngai taka thawk chhunzawm zel tura chahin, duhsakna a hlan a. Lawngtlai Sub-Divisional Officer (Sadar) Pi TT Beikhaizi chuan lawm thu sawiin, hun tihtawp a ni.

 

Dr Andrew H. Vanlaldika hian June ni 16, 2020 khan Lawngtlai Bawrhsap hna hi a zawm a. Tunah hian Mizoram sawrkar Food, Civil Supplies & Consumer Affairs-ah Director ni turin Lawngtlai District Bawrhsap office hi a chhuahsan dawn a ni.

 

Vawiina a puala hun bik buatsaih piah lamah hian Officers’ Club Lawngtlai (OCL), Mizoram Journalists’ Association (MJA) Lawngtlai District, pawl leh department eng emaw zat chuan mahni pualin a hranpain Bawrhsap kal chhuak tur thlahna hun hi an lo hmang tawh hlawm a ni.

 

Issued by : I&PRO, Lawngtlai