Lawngtlaiah District Level Committee on Fire Prevention an ṭhu khawm

Vawiin khan Lawngtlai District Level Committee on Fire Prevention (DLCFP) chu an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm a. Kangmei ven kawnga hma lak dan tur hrang hrang an sawi ho.

 

Chairman Pu Amol Srivastava chuan kangmei chhuak vanga ramngaw chereu leh boruak bawlhhlawh chu ramsate leh mihringte tan thil pawi tak a nih bakah, ramsa leh mihring tan nunna channa hial a thlen thei tih sawiin, kangmei a chhuah loh nana lo inven lawk chu khua leh tuite mawh a nihzia inzirtir uar zel a ṭul a ni, a ti a. Member kal khawmte chu ngunthluk taka ngaihtuahna seng turin a sawm a ni.

 

Lai Autonomous District Council (LADC)-a Assistant Conservator of Forests (ACF) Pu Albert Larinzuala hnen aṭangin kum hmasa lama hma lak dan report ngaihthlak a ni a. Kumin atana hma lak dan tur hrang hrang sawi ho zui nghal a ni.

 

Kumina hma lakna tur hrang hrang zingah, February ni 6 – 10, 2023 chhunga hman tur Fire Prevention Week 2023 hawnna chu February ni 6-ah buatsaih ni se, tih a ni a. Hun hman dan tur kimchang ruahman chu Member Secretary kutah dah a ni. Kumin ṭhal chhung hian Lawngtlai District chhunga kangmei venna lam inzirtirna (awareness campaign) uar zawka buatsaih leh tura ruahman niin, hemi atan hian khaw hrang hranga zirtirna pea tei chhuah bakah, media kal tlanga panel discussion tihchhuah, video clip siam, thuziak (hoarding board/poster) tar te kalpui tum a ni.

 

Kangmei ven kawnga thawk ṭha khuate chawimawina ‘Village Level Fire Prevention Award 2023’ chu kumin pawh hian siam leh tum a ni a. State Level Committee-in lo hal theih hun chhung a bituk March ni 15 chu zawm ve tura ngenna leh leipui/huan hal hun leh Protected Area chhehvel khuaa lo hal hun tlai ber atana March ni 3 bithliah tura District Council thuneitute ngen te, sapela ram vah leh ram hal khapna tichhuak tura District Magistrate ngen te rel a ni a. Ram kang tur ven nana mei dai phiah te, kangmei ven chungchanga mipui zirtirna a tam thei ang bera puangzar tura VC, YLA leh kohhran lam ngen te pawh rel a ni bawk.

 

Issued by: I&PRO, Lawngtlai