Lawngtlaiah Drugs Awareness Rally buatsaih a ni

Vawiin khan Lawngtlai Police te chuan Lawngtlai District chhunga ruihhlo dona beihpui thlak mek kalpui zel nan National Cadet Corps (NCC), Don Bosco School te leh Drugs Reduction Squad, CYLA te nena ṭang kawpin Lawngtlai khawpui chhungah ruihhlo dona kawng zawh, “Drugs Awareness Rally” an huaihawt.

 

He rally-ah hian Lawngtlai Sub-Divisional Police Officer Pu Beimosia Lapi chuan Lawngtlai khawpui chhunga ruihhlo dona kawnga pui ṭhintu Drugs Reduction Squad, CYLA te, YLA branch hrang hrangte leh mipuite chungah lawm thu sawiin, Lawngtlai khawpui leh District pum chu ruihhlo laka a lo fihlim zel theih nan hma lam hunah pawh thawhpui chhunzawm zel turin tlawmngai pawlte leh mipuite a sawm a ni.

 

Lawngtlai Police te chuan nikum, 2022 aṭang khan ngawrh takin ruihhlo do beihpui hi an thlak a. Nikum aṭanga kumin January thla thleng khan ND&PS Act hnuaiah case 17 ziak lutin, ruihhlo kaihhnawihah mi 25 an man tawh a. Heroin gram 407.68, Ganja gram 166.55 leh Opium kg 2 an man tawh a. Hei bakah hian District Headquarters chhunga high school leh higher secondary school hrang hrang 12-ah drug leh cyber awareness campaign pawh an buatsaih tawh bawk.

 

Issued by : I&PRO, Lawngtlai