Lawngtlaiah KVK leh ATMA huaihawtin “Kisan Mela” buatsaih a ni

India ramin zalenna a hmuh kum 75-na lawmna (Azadi Ka Amrit Mahotsav) kal mekah Krishi Vigyan Kendra (KVK), Lawngtlai leh Agriculture Technology Management Agency (ATMA), Lawngtlai te ṭang kawp huaihawtin vawiin khan Chawnhua KVK hmunpuiah “Kut Hna Thawktute Kutpui” (Kisan Mela/Farmers’ Fair) buatsaih a ni. 

 

Kisan Mela hawnna inkhawm, KVK Training Hall-a buatsaihah Lai Autonomous District Council (LADC)-a Agriculture enkawltu Executive Member Pu Lalropuia Chinzah chu Khuallian a ni a. Lawngtlai District-ah State sawrkar leh District Council hnuaia Agriculture leh a kaihhnawih department-a thawktute thawh hona ṭha tak chu kut hna thawktute’n a zar an zo chho mek tih sawiin, kut hna thawh kawnga Lawngtlai District hmasawn nan ruahmanna hrang hrang duan chhoh zel a ni, a ti a. Kut hna thawktute chuan mahni remhriatna leh thiam dan ang anga hma la tawp lovin, mi thiamte rawn nachang hriat leh an thu zawm thiam kawngah intihhmuh zel a ṭul a ni, a ti.

 

KVK Lawngtlai hian COVID-19 hri len nasat lai khan internet hmanraw kal tlangin kut hna thawktute kaihhruai nan zirtirna an pe reng a. Chu’nga a pawimawh zual an lak khawm chu “Farmers Online Seminar on Addressing COVID-19 Impact on Agriculture, Food Security and Livelihood in Mizoram” tih hming chawia a bu-ah siamin, he lehkhabu hi Khuallian Pu Lalropuia Chinzah chuan a tlangzarh nghal a. Hri leng karah pawh KVK mi thiamte’n kut hna thawktute hmakhua ngai a, a theih ang anga kaihruai a, hma an lakpui chuan KVK Lawngtlaia thawktute’n kut hna thawktute hmangaihna tak tak neia dawm kan an tumzia a lan chiantir hle a ni, a ti.

 

KVK Lawngtlaia Senior Scientist & Head Dr C. Lalfakawma chuan Mela hawnna hun hi kaihruaiin, KVK-a Subject Matter Specialist (Home Science) Pi Vanlalruati’n lawm thu a sawi a. ATMA Project Director Dr Benjamin Lalduhawma kaihhruaia hun ṭhen hnihna hmanah KVK-a Subject Matter Specialist (Agronomy) Pu C. Rualthankhuma’n buh leh thlai chin chungchanga hriat tur pawimawhte a lem nen entirin a sawi fiah a. Agriculture, Horticulture, AH & Vety leh Fisheries department ai awhte hnen aṭana thu sawi ngaihthlak niin, kut hna thawktute nena inkawm hona hun hlawk tak hman a ni bawk.

 

Vawiina Lawngtlaia KVK leh ATMA te’n Kisan Mela an buatsaihah hian hmun hrang hranga kut hna thawktute thei leh thlai thar chhuah leh sawngbawl sate lak khawm a, pho chhuah a ni a. KVK leh ATMA te’n an khawl leh thiam thil thulkhung (technology) hrang hrang pho chhuak bawkin, Veterinary leh Agriculture Free Clinic buatsaih a ni bawk a. Mela hi mipuiin an hlut hle a ni

 

Issued by: I&PRO, Lawngtlai