Lawngtlaiah PM-KISAN chungchang sawi hovin District Level Committee an ṭhu khawm
Vawiin khan Lawngtlai District Level Grievances Redressal and Monitoring Committee under PM-KISAN chu an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm.
Sawrkar Laipui ruahmannaa kut hna thawktute ṭanpuina PM-KISAN (Pradhan Mantri Kisan Samman Nidhi) hi kum 2019 aṭang khan Mizoramah kalpui a ni a. He scheme hnuaia inziak lut, kut hna thawktu, ram nei ngeite chu kum tin bank kal tlangin ṭanpuina ₹ 6,000/- pek ṭhin an ni.
He ṭhut khawmah hian Lawngtlai District chhunga PM-KISAN kalpui chungchanga harsatna hrang hrang awmte thlir ho niin, a chin fel dan tur sawi ho a ni a. PM-KISAN hnuaia inziak lut thei lo zinga mi – sawrkar hna thawk leh pensioner-te zinga inziak lutte leh chhungkaw khat aṭanga mi pakhat aia tam inziak lutte paih dan tur te; he scheme-a inziak lut, anmahni la finfiah lohte finfiah dan tur te; he scheme hnuaia hamṭhatna dawng thei tur Lawngtlai District-a kut hna thawktute September 2022 ral hmaa PM-KISAN portal-a an inziah luh kim theih nana hma lak dan tur te sawi ho a ni.
Issued by: I&PRO, Lawngtlai