Close

Lawngtlaiah Swachhata Hi Seva 2022 hawnna hun hman a ni

Publish Date : 17/09/2022
India ramin zalenna a hmuh kum 75-na lawmna, ‘Azadi Ka Amrit Mahotsav’ kal zelah “Faina hi Rawngbawlna a ni” tih thupui hmanga Lawngtlai District chhunga faina beihpui thlakna tur, “Swachhata Hi Seva, 2022” bul ṭanna hun chu tukin zingkar khan Lawngtlai Bazar Venga Areopagy hmunah hman a ni.
 
He hun hmanpuitu, Lai Autonomous District Council (LADC)-a Sanitation changtu Executive Member Pu Lalropuia Chinah chuan faina chungchangah State sawrkar department hrang hrangte, District Council lam thuneitute, tlawmngai pawl leh mipuite thawh ho a ṭul tak zet tih sawiin, ṭhangtharte rilruah faina kawnga an mawhphurhna sanzia tuh ngheh a ṭul avangin fai beihpui thlakna kawngah sikul naupangte pawh a tam thei ang ber inhnamhnawihtir a pawimawh a ni, a ti.
 
He hun hi PHED Lawngtlai WATSAN Division-a Sr Executive Engineer Er Netralal Jaisi chuan kaihruaiin, Swachhata Hi Seva hma lakna awmzia leh beihpui thlak a nih dan tur a sawi fiah a. Mumal lo taka bawlhhlawh thehthang leh plastic thehthang mai maiin ram leilung, lui tui leh boruak a tihbawlhlawh dan leh mihringte leh nungchate’n kan tuar dan te a sawi fiah bawk.
 
He hunah hian Lawngtlai District Bawrhsap Pu Amol Srivastava chuan Swachhata Hi Seva 2022 faina beihpui thlak chu hawn a nih thu a puang a. Faina thuchah kenga zirlai naupangte kawng zawh (rally) tur chu a vai liam nghal a ni.
 
Hemi hnu hian zirlai naupangte chuan faina pawimawhzia tlangaupuiin Lawngtlai khawpui chhung kawng dung an fang zui nghal a ni.
 
Issued by: I&PRO, Lawngtlai