Lawngtlaiah World AIDS Day hman a ni

Vawiin khan Mizoram State AIDS Control Society (MSACS) huaihawtin Lawngtlaia Govt Region Higher Secondary School (GRHSS) Auditorium-ah zirlai naupangte nen World AIDS Day hman a ni.

 

He hun hi Lawngtlai Additional Deputy Commissioner Pi Marilyn Rualzakhumthangi chuan Khuallian niin a hmanpui a. AIDS veite hmusit leh endawng lo va, hmangaih a, chhan chhuak zawk turin World AIDS Day chu kum tin hman ṭhin a nih thu sawiin, zirlai naupang kal khawmte chu AIDS veite hmangaih a, AIDS natna zawka chu hua a, do tlat turin a chah a. Kum tin HIV/AIDS vei an pun zel thu leh kumin January aṭanga October thla thlenga Lawngtlai District Hospital-a thisen test 668 aṭangin HIV positive hmuh chhuah thar 59 an awm thu te, nu nau pai 633 test aṭangin HIV positive 6 an awm thu te tar langin, fimkhur a ṭul tak zet tih a sawi a. Zirlai naupangte chu HIV/AIDS kai theihna chi hrang hrang – damdawi hman khawloh leh nupa kar ni lova mipat hmeichhiatna hman kawngah te inthiar fihlim tur leh mi dang hnena HIV/AIDS laka himna tur zirtirtu nih tum turin a chah a ni.

 

He hun hi Lawngtlai ICTC Counsellor Pu Cz. Rodingliana’n a kaihruai a. STI Counsellor Pi Darbuangpuii chuan Sexually Trasmitted Infection (STI) leh Respiratory Tract Infection (RTI) chungchang a sawi fiah a. Lawngtlai Mobile ICTC Counsellor Pi Christina Lalrosangi chuan a lem nena entirin HIV/AIDS chungchanga hriat tur pawimawh sawi fiahin, nun fimkhur tura zirtirna a pe bawk.

 

Lawngtlai ICTC hnuaiah kum 2004 aṭanga kumin October thla thleng khan thisen test 22,564 awm tawhin, HIV positive hmuh chhuah 398 an awm tawh a, an zinga mi 40 chu nau pai test aṭanga hmuh chhuah an ni.

 

World AIDS Day hi World Health Organisation (WHO)-in khawvel puma hriselna lama ni bik a ruat 11 zinga pakhat niin, kum 1988 aṭang khan kum tin hman a ni a. Kumin hi a vawi 35-na niin, thupuiah “Equalize” (intluk tlanna) tih hman a ni.