Lawngtlaiah Youth & Eco Club Festival buatsaih a ni

Vawiin khan Samagra Shiksha, Lawngtlai District huaihawtin Govt College Veng High School tualah Lawngtlai District-a middle school thlan bikte tan “Reuse, Recycle, Reduce” tih thupui hmangin Youth & Eco Club Festival buatsaih a ni.

 

Samagra Shiksha, Lawngtlai District-a District Project Co-ordinator (DPC) Pi R. Lalnunthari chuan inlawmna thu sawi leh hun buatsaih chhan sawi fiahin Youth & Eco Club Festival hi a hawng a ni.

 

He Youth & Eco Club Festival hian a tum ber chu – sarang leh plastic lampang chi, fimkhur lo taka thehthang avanga leilung leh boruak tichhe thei, environment leh mihring hriselna atana pawi thei ang chi te paih mai lo va, a hman nawn theih ang ang hman nawn leh hman tlem inzirtir a ni a. Youth Club leh Eco Club te’n stall siamin, thil chhia leh hman hnu thehthang mai tur aṭanga thil ṭangkai leh ṭha zawk an siam chhuahte chu a duh tana en theih leh lei theihin an pho chhuak a. Zirlaite’n zai leh lam leh an thiam thil dang entir bawkin, variety programme hlimawm tak nen hun hman a ni.

 

Issued by : I&PRO, Lawngtlai