MJA Serchhip District te’n Lawngtlai Bawrhsap kutah Bangladesh raltlante ṭanpuina an hlan

Publish Date : 22/02/2023

Mizoram Journalists’ Association (MJA), Serchhip District te’n Bangladesh raltlante ṭanpuina tura charity sum an hmuh, ₹ 36,126/- chu vawiin khan Lawngtlai Bawrhsap Pu David Lalthantluanga kutah Lawngtlai District MJA hruaitute’n an hlan.

Ṭanpuina sum hi kumin Republic Day lawmna chi khat atana Er F. Sanglura Band leh Serchhip tualchhung zaithiamte’n MJA Serchhip District huaihawta Serchhipa Charity Concert an neiha pawisa an hmuh aṭanga hlan a ni a. Bangladesh aṭanga sahimna zawnga Lawngtlai District-a tlan lutte ṭanpuina tura tih niin, Serchhip District MJA ai awhin Lawngtlai District MJA President Pu Lalngheta Ralte chuan Lawngtlai Bawrhsap kutah hian a hlan a ni.

Lawngtlai Bawrhsap Pu David Lalthantluanga chuan raltlante ṭanpui nana Serchhip District MJA kal tlanga mi tlawmngai leh inphalte thawh khawm an dawng chu lawmawm a tih thu sawiin, raltlante’n an mamawhna zawnah ṭangkai taka hman a nih tur thu a sawi.

Tun dinhmunah District Administration-in a chhinchhiah danin, Bangladesh aṭanga an sahimna zawnga lo tlan lut hi Lawngtlai District-ah mi 531 an awm mek a. District Administration aṭangin an mamawh hrang hrang – chen lailawkna, mutbu, ei leh in leh ni tin mamawhte ngaihtuahsak a, a theih ang anga tuamhlawm leh chhawmdawl an ni.

Serchhip District MJA hnen aṭanga raltlan ṭanpuina lo dawngtu Lawngtlai Bawrhsap hi Nodal Officer & Project Director DRDO Pi Marilyn Rualzakhumthangi, Additional DC Pu Abraham Beirazi Khithie, SDO (Sadar) Pi TT Beikhaizi leh Lawngtlai DIPRO Pu C. Lalhruaitluanga te’n an ṭawiawm a ni.

Issued by : I&PRO, Lawngtlai